Du må være innlogget for å få tilgang til alle nyheter! Logg inn eller opprett brukerkonto.

Frå Stemmen til Verpekassen

Frå Stemmen til Verpekassen

Leif-Ole Terøy går på tur saman med ein vennegjeng i Hjelmeland nesten kvar einaste veke. Han deler turtipsa sine med Strandbuen sine lesarar. FOTO: Linda Tungland

Ingen ting er som tur ein flott vinterdag!

Tekst:

Publisert:

Sundag 15. januar i år var ein av desse dagane vi sjeldan har her på Vestlandet; litt snø, nokre kuldegarder og mykje sol! Ein dag vi berre var nøydt til å ta eit oppgjer med «dørstokkmila»! Og valet vart ein «gamal» klassikar; ein tur vi ofte går som kveldtur og trim; frå Stemmen til Verpekassen.

Starten er altså ved Stemmen i vestre enden av Hetlandsvatnet,og vi følgjer skogsvegen mot Sigmundstad. Dette er ein god, og godt merkt, skogsveg, som går langs Litlavatnet og over til Sigmundstad. Tidlegare var dette ein del av det tradisjonsrike Fisterløpet, men det har fått ny trasé.

Se bildet større

Sigmundstadtjødna, som ikkje lenger er eit tjørn. FOTO: Leif-Ole Terøy

Langs skogsvegen har det vore skogshogst, men det er rydda opp slik at det går godt å kome fram. Første del av vegen er òg den same som ein nyttar når ein skal til Heståsen, eller berre rundt Litlavatnet. Desse turane har eg skrive om før.

Når vi kjem over mot Sigmundstad, ser vi denne dagen at det er tråkk frå Lysåsen òg. Her har det kome opp mange hytter, og eigarane av desse har nok oppdaga det fine tur-terrenget på «baksida».

Eigarane av garden Sigmundstad, Anne Berit og Anders, har lagt til rette for turgåarar, mellom anna til Verpekassen, over Jomåsen med fleire. Her eg eit godt utval av skogsvegar som vert godt vedlikehaldne, og gir mange alternativ. Skigruppa til Hjelmeland Idrettslag driv «elghuffsing» her om hausten, og legg grunnlaget for gode prestasjonar i løpet av vinteren. Eg har fleire gonger tenkt at dette måtte vere ein veldig god stad å arrangere meisterskap i terrengløp; det er berre å merke opp!

Se bildet større

Skjekkeåsen, 327 meter over havet. Her er det flott utsikt! FOTO: Leif-Ole Terøy

Når vi kjem over til Sigmundstad går vi først langs Sigmundstadtjødna; det vil seia det var eit tjørn, men dei har tappa ho ut, så det kan knapt kallast eit tjørn lenger. Tidlegare var dette ein populær plass for skeiseløp, for tjørnet fraus fort til.

Mange startar turen til Verpekassen frå Sigmundstad, det vil seia nede ved garden der skogsvegen startar. Ein får då ein god start før motbakkane kjem, for dei kjem! Den første etter tjørnet er ikkje så «galen», men det er godt å kome opp, trekke pusten og nyt utsikten mot Ryfylkeøyane.

Skjekkesåsen har vi på venstre hand, og det er mogeleg å ta turen rundt. Det får vere ein annan gong. Eit problem kan vere at her er så mange vegar at det kan vere vanskeleg å orientere seg, om ein ikkje er kjent. Når ein har Skjekkesåsen på venstra hand, så hald til høgre og deretter rett fram.

Den siste bakken opp til Sigmundstadåsen kjennest på pust og i beina, spesielt ein dag som dette med litt laus snø. Men opp kjem vi, og går mot Verpekassen. Den siste del av turen gjekk i skugge, og det er ingen ting som er så godt som å kome ut i sola! Og med litt snø på bakken vert det utruleg lyst.

Se bildet større

Rundt heile Verpekassen var det hestar denne dagen. FOTO: Leif-Ole Terøy

Verpekassen er ei hytte, bygt av Anne Berit og Anders (Verpe). Den er open heile året, og her kan ein gå inn og skrive namnet sitt i boka, og kanskje få seg ein twist? Denne dagen er det folksamt her, med mange som hygger seg etter ein fin tur opp hit. «Varmestuens venner», kjem det på spøk frå Øyvind. Utanfor har det og samla seg ein flokk, av firbeinte. Anne Berit og Anders har sin store flokk med hestar (Nordlandshest?) som går fritt her oppe. Dei er glade i litt kos!

Ned igjen går vi den litt bratte skogsvegen mot Sigmundstad. Ikkje minst gjer vi det for å kunne nyte ei fantastisk utsikt mot Ryfylke-øyane. Mang ein gong har vi gått her i det sola går ned i vest, og det er ikkje få bilde av solnedgong vi har teke her!

Se bildet større

Flott utsikt på veg ned frå Verpekassen, mot Ryfylkeøyane. FOTO: Leif-Ole Terøy

Vi kjem ned til Sigmundstad og fortsett rundt tjørnet, forbi plassen «Bråtet» som det ikkje bur folk på no, men som kanskje har ei av dei finaste utsiktene på Fister! Følgjer skogsvegen, som Anders har brøyta, vidare langs tjørnet, før vi tar av opp til venstre og same vegen som vi kom attende til Stemmen.

Turen er om lag 7 kilometer lang, og om du ikkje har hatt det for travelt, men har nytt dei mange flotte stadane med utsikt, kosa litt med hestane og tatt ein kaffetår; så har det gått om lag to timar. Har ein med born så må ein kanskje rekne litt betre tid? Uansett: Ta turen om Verpekassen, enten frå Stemmen, eller den litt kortare frå Sigmundstad.
God tur!

Kartreferanse:
https://www.endomondo.com/users/2037662/workouts/658349948

Se bildet større

Turen denne dagen startar ved Stemmen i nedre del av Hetlandsvatet. Ein stad å starte mange fine turar. FOTO: Leif-Ole Terøy

Se bildet større

Vi går langs Litlavatnet, vasskjelda til fisterbuen. FOTO: Leif-Ole Terøy

Se bildet større

På andre av denne åsen ligg Lysåsen hyttefelt, og det er tydeleg at eigarane har funne fram til turterrenget på Sigmundstad! FOTO: Leif-Ole Terøy

Se bildet større

Sauene skal ha mat, ikkje minst no når det er snø og kald. FOTO: Leif-Ole Terøy

Se bildet større

På veg opp mot Verpekassen kan det vere godt å «puste på» litt; snu seg og sjå mot Heståsen (nærast) og Lauvåsen med Fistermasta. FOTO: Leif-Ole Terøy

Se bildet større

Det er herleg å kome frå skugge og ut i sola! FOTO: Leif-Ole Terøy

Se bildet større

Verpekassen, med folk og dyr. FOTO: Leif-Ole Terøy

Se bildet større

Ein av dei som var ved Verpekassen denne dagen. FOTO: Leif-Ole Terøy

Se bildet større

Mykje folk og dyr ved Verpekassen i dag. FOTO: Leif-Ole Terøy

Se bildet større

Sigmundstad. Nede ved vegen her kan ein starte fleire fine turar. FOTO: Leif-Ole Terøy

Se bildet større

På «Bråte» bur det ikkje folk lenger. Vi går forbi her på rundturen attende til Stemmen. FOTO: Leif-Ole Terøy

Nyheter fra andre aviser

Do NOT follow this link or you will be banned from the site!